Gunung Kawi magenah ring desa Tampaksiring Kabupaten
Gianyar, sawatara wenten 38 km ngajakanginang saking kota Denpasar. Irika
wenten wangunan kuno sane marupa candi-candi, ceruk-ceruk miwah wihara-wihara.
Ring basan tengah palebahan genahe punika wenten tukad sane mawasta Tukad
Pakerisan . Tukad punika waluya ngepah palebahan irika dados kalih. Wewangunan
kuno sane magenah dauh tukad inggih punika candi petang siki taler wenten
wihara-wihara miwah ceruk-ceruk genah sang tapa riin. Nanging sane magenah ring
dangin tukad inggih punika candi limang siki, taler wenten wihara-wihara miwah
ceruk-ceruk. Yening wilangin candi-candi inucap maka sami wenten sia candi, tur
sami magenah nempel ring abing tukade. Punika awinan candi irika taler kawastanin
“Candi Tebing”.
Para Sujana
saking dura Negara miwah sujana-sujana Indonesia, sampun ngwentenang panureksan
indik kawentenang wangunan kuno punika. Manut para sujana inucap, wangunan kuno
punika kawangun duk abad XI Masehi daweg panyenengan raja sane mapuspata
Marakatapangkaja.
Daweg tahun 1920, saking Dinas Purbakala
sampun mapidabdab mecikang miwah menahin wangunan inucap mangda tetep lestari,
tur mangda wenten katamiang ring alit-alite wekasan. Mangkin wangunan punika
kantun becik, kapiara olih panyungsung wedasa miwah pamerentah.
Rauh mangkin makeh anake mrika gumanti
mangda uning kautaman kabudayaan tetamian leluhure sane riin.
0 Response to "Gunung Kawi"
Post a Comment